ta refleha riba dia Mundial di Turismo
Colegio EPI unidad Hospitalidad & Turismo, como e scol cu ta prepara studiantenan pa ta lidernan den e industria di hospitalidad y turismo na Aruba, ta celebra awe 27 di september ‘World Tourism Day”. Dia Mundial di Turismo tin e aña aki como tema ‘linking cultures’, es decir e acercamento di cultura. Na Aruba esaki ta sigur un tema cu nos ta hopi conoci cune, mirando tanto hende di diferente nacionalidad cu ta biba riba nos isla y cu ta bishita nos isla tur aña.
Den conexion cu esaki EPI Hospitalidad & Turismo ta refleha ariba e dia aki cu pa mas di 25 aña ta ofrece studiantenan di Aruba e posibilidad pa sigui un estudio den e ramo hotelero na Aruba.
Historia - Aruba Hotel School
Ta na aña 1982 cu e scol a lanta pa prome biaha, popularmente yama Bushiri Hotel School. Durante añanan e scol a pasa door di diferente transcicion y a carga varios nomber. E tempo aki e scol a cuminsa cu un klas hopi chikito caminda cu studiantenan tabata cuminsa e estudio cu hopi pasion y tabata ansioso pa siña tur cos di e industria di hospitalidad y turismo.
Na aña 1997 Aruba Hotel School a bira parti di Colegio EPI como Unidad Hospitalidad & Turismo. Na aña 2002 e scol a wordo ubica na su edificio nobo ariba e awor campus di Colegio EPI. Na e localidad aki, e studiantenan pero tambe e docentenan mester a adapta na e scol nobo cu awor no ta cay bow di e capa di un hotel mas.
Diferencia entre antes cu awor
Durante e ultimo 29 aña hopi cos a cambia den e industria di hospitalidad y turismo. Caminda cu antes e klasnan tabata chikito y studiantenan tabata motiva automaticamente pa studia hoteleria, awendia e klasnan ta hopi mas grandi y e docentenan mester haci esfuerzo pa hisa motivacion di hopi studiante. Antes e studiantenan tabata escohe e profesion aki cu pasion y cu siguransa cu nan lo kier sigui un carera den e industria di hospitalidad y turismo na Aruba. Tambe antes nan tabata biba e ‘hospitalidad’ asina reconocibel den nos hendenan. Awendia, hopi studiante no tin e ‘hospitalidad’ ey asina automatico, y hopi ta escohe e estudio como un trampolin pa e siguiente estudio y no necesariamente como e comienzo di un carera den e industria di hospitalidad y turismo.
Tambe e lugar fisico ta un diferencia. Tempo di Aruba Hotel School e studiantenan tabata bay scol y ‘stage’ na e hotel di biaha y consecuentemente tabata biba den e esfera di hospitalidad constantemente. Na EPI Hospitalidad & Turismo esaki no ta e caso, pasobra e studiantenan ta principalmente na scol so, maske tin cu remarca cu nan lo haci pasantia na diferente hotelnan y organisacionan turistico durante nan estudio. E parti positivo di e scol ta si cu e ta un scol completamente nobo, cu un cushina amplio y moderno y un restaurant propio.
E graduado di antes hopi biaha tabata sigui traha di biaha y na un hotel of restaurant. Awendia mayoria studiante ta sigui studia afor y ta traha no solamente na hotel pero den diferente ramo turistico manera agencianan di viahe, aerolineanan y tambe agencianan turistico.
Por bisa cu Aruba Hotel School a sirbi e industria di e tempo ey, na e escala di e temporada caminda cu Aruba su industria turistico tabata hopi mas chikito y cu awor, cu EPI Hospitalidad & Turismo, un scol apart y mas grandi, ta sirbi e industria turistico grandi cu Aruba tin awor.
Maske cu awor mester haci un poco mas esfuerzo pa motiva e studiante, na final, cada graduado ta demostra di tin tur capacidad y abilidad pa ta futuro lidernan di industria mescos cu graduadonan anterior. Cu hopi orguyo e scol ta mira back ariba diferente graduadonan hopi conoci den nos comunidad y lidernan den e industria hotelero. Un di esnan mas conoci ta nos Minister di Turismo y Labor señor Otmar Oduber. Tambe varios di e graduadonan despues di a traha den e ramo turistico a dicidi di bin back scol, den e caso aki como docente, pa sigui siña y inspira e generacion nobo cu e pasion di hospitalidad y turismo.
EPI Hospitalidad & Turismo
EPI Hospitalidad & Turismo no a para keto cu tur desaroyo y ta sigui amplia su estudionan na locual e mercado ta pidi pe. Pa cu esaki e Unidad ta sigui traha estrecho cu diferente Colleges y universidadnan pa asegura cu tur graduado por sigui studia pa termina nan Bachelor’s Degree den 2 of 3 aña. Tambe ta traha continuamente ariba e curriculo di enseñanza pa por sigui ofrece estudionan na nivel.
Aparte di esaki, ta traha riba e parti di desaroyo personal di cada studiante. Por ehempel pa medio di cursonan di liderazgo ta empuha e studiante pa ta lider den su futuro y di sirbi como un bon ehempel den nos comunidad. Esaki ta algo cu sigur EPI Hospitalidad & Turismo ta tuma hopi bon na cuenta pa sigui entrega graduadonan capacita y motiva na e industria hotelero.
EPI Hospitalidad & Turismo ta refleha back den pasado caminda cu a cuminsa cu e programa di Hotel and Restaurant Management y cu te awe ta wordo ofreci na e unidad. Esaki ta refleha e nivel di apoyo y compromiso cu tin na e unidad y den e industria cu durante añanan a keda sostene tur proyecto di e unidad.
Pa finalisa gerencia, staff, docentenan y studiantenan di EPI Hospitalidad & Turismo ta desea tur profesional den e ramo di hospitalidad y turismo aki na Aruba un feliz dia di refleccion y observacion ariba e dia Mundial di Turismo