Colegio EPI

Pa forma profesionalismo y personalidad

Nieuws

Easter Egg Hunt pa e clientenan di Centro di Encuentro Sonrisa

by
webmaster

Oranjestad-     Diaranson ultimo a tuma lugar e celebracion di Pasco Grandi na Centro di Encuentro Sonrisa. Kiwanis Circle K di Colegio E.P.I. conhunto cu Kiwanis Aktion Club di Sonrisa a organisa un atardi yen di actividad pa e clientenan Sonrisa.

Ariba e dia aki e clientenan por a pasa rato un masha dushi cu e miembro nan di Kiwanis Circle K di Colegio E.P.I. y Aktion Club, unda e miembro nan a organisa diferente wega y actividad cunan por a participa aden entre otro; face painting, careda cu cusinchi meimei di pia, careda di taira, webo den cuchara y mucho mas. Despues di e actividadnan a tuma lugar e buscamento di webo. Un total di casi 60 cliente di Sonrisa a forma parti di e evento aki, di cual ambos club ta mas cu satisfecho di con e dia aki a bay.

Kiwanis Circle K ta un organisacion internacional cu a wordo funda pa asina duna ayudo y servicio na comunidad den diferente forma. Tambe, Circle K International ta parti di e organisacion Kiwanis International cu desde aña 1936, ta haciendo trabounan voluntario na diferente pais rond di mundo. Kiwanis Circle K of Colegio E.P.I ta bayendo pa apenas nan prome aña y ya caba tin asina hopi exito! Sigur e miembronan y tammbe nan ‘sponsor club’ Kiwanis Club of Aruba ta mas cu contento cu e frutonan cu Kiwanis Circle K di Colegio E.P.I. ta cosechando. Como meta Kiwanis tin pa sirbi e muchanan rond di mundo como cu mucha ta e focus principal di e organisaceion.

Kiwanis Circle K di Colegio E.P.I. y Aktion Club ta sumamente contento cu e actividad aki. Un danki ta bay pa Centro di Encuentro Sonrisa cu semper a sa di sostene ambos club den tur proyecto cu nan ta ehecuta.

Na tur instancia cu tin mester di hobenan voluntario y pa tur studiante di Colegio E.P.I cu ta desea di bira miembro di Kiwanis Circle K of Colegio E.P.I, porfabor tuma contacto cu Kiwanis Circle K di Colegio EPI na: 525 8798, circlek@epiaruba.com of manda nos un mensahe riba Facebook: “Kiwanis Circle K of Colegio E.P.I”.

11083628_1699766700250474_4291231934437055326_n 11091486_1699770546916756_5689356960819957383_n