Colegio EPI

Pa forma profesionalismo y personalidad

Nieuws

YouthMax Training pa studiantenan di Colegio EPI unidad Hospitalidad & Turismo

by
webmaster

Unidad Hospitalidad & Turismo di Colegio EPI a organisa recientemente un YouthMax Training pa tur studiantenan di e promer aña escolar di e opleidingnan Hospitality Management (FS) y Culinary Arts (IE).  E training aki a wordo crea originalmente door di Dr. John Maxwell y a wordo organisa den e ocasion aki como parti di e programa di orientacion pa tur e studiantenan nobo di Unidad Hospitalidad & Turismo. E facilitadornan di e YouthMax Training aki tabata sra. Federica Jones y sr. Giovanni Lew Jen Tai.

Termento, fracaso, un nivel abou di imagen-propio, y un caracter debil y negativo e.o. ta centralisa den e curason di retonan cu hobennan ta enfrenta awendia. E YouthMax Training su meta primordial ta pa yuda e hobennan den nan desaroyo y crecemento pa enfrenta e retonan den nan bida pero tambe pa realisa cu e mundo aki ta constantemente cambiando.

E YouthMax a wordo teni riba 2 dia. Riba e promer dia e studiantenan a siña con pa tuma accion positivo pa medio di un actitud positivo cual definitivamente lo por yuda stop termento pero tambe pa yuda otro victimanan hoben di termento pa por enfrenta esaki cu curashi. E siguiente parti tabata pa yuda e studiantenan compronde con pa trece cambio, crecemento y bira exitoso den diferente aspecto di nan bida door di siña di tur nan erornan.

Riba e di dos dia e hobennan a ricibi splicacion di diferente manera pa nan desaroya y mantene un imagen-propio cu ta positivo. Studiantenan a siña cu tur hende ta unico y special. Nos mester balora otro personanan di tal manera cu e hoben ta mantene su imagen-propio positivamente. Como e di cuater y ultimo parti, e Youthmax Training a culmina cu consehonan con pa desaroya un caracter firme, positivo y efectivo. E desaroyo di un persona su caracter ta un factor primordial cu ta asisti un hoben pa obtene y mantene un grado halto di exito den su bida personal y profesional. Como meta final e facilitadornan a ekipa tur e studiantenan presente cu aspectonan di liderazgo pa e studiantenan sa, por medio di nan caracter positivo, con pa mantene un impacto positivo den nan propio bida y den bida di otro hende.

Sra. Jones y Sr. Lew Jen Tai a termina e evento gradiciendo tur studiante pa nan participacion y entusiasmo y a desea tur studiante hopi exito den nan carera como studiante di Colego EPI.

This slideshow requires JavaScript.

Tags: