Colegio EPI

Pa forma profesionalismo y personalidad

Nieuws

Anochi di informacion di tur unidad na Colegio EPI diabierna awor 28 di maart

by
webmaster

Colegio EPI ta organisa un anochi di informacion pa tur studiante di scolnan secundario. E anochi aki lo tuma lugar diabierna awor dia 28 di maart, di 6:00 p.m. pa 9:00 p.m.

Meta principal di e anochi di informacion aki ta pa informa studiantenan di scolnan secundario EPB, MAVO y HAVO tocante e opleidingnan cu tin na Colegio EPI y kico ta e rekisitonan di admicion. Ta importante pa tene na cuenta cu pa wordo acepta pa un opleiding mester cumpli cu e profiel cu e opleiding ta exigi. Colegio EPI ta encurasha mayornan tambe pa bin cu nan yiunan pa asina duna guia y sosten den nan decision pa escoge un estudio.

Aparte di duna informacion di tur e opleidingnan, tambe lo tin oportunidad pa haya rondleiding na cada unit. Den e Open Leercentrum (OLC) lo por inscribi pa e aña escolar nobo y tambe lo tin informacion general di cada opleiding. Pa e studiante cu ainda no ta sigur den cua ramo e kier sigui studia, Colegio EPI ta encurashe pa bishita tur e unidadnan pa asina e por ta sigur di tuma un bon decision pa su futuro.

Parkeerplaats y entrada di cada unit

Colegio EPI ta pidi tur hende pa yega na ora pa asina por pasa bishita tur unidad. Si bo persona sa specifico cua unidad bo kier bishita, por favor tene cuenta cu Colegio EPI tin varios lugar di parkeer cu ta keda mas serca di cada unidad. Pa bishita unidad Ciencia & Tecnologia por parkeer dilanti gate 2. Pa bishita unidad Hospitalidad & Turismo por parkeer dilanti e unit mes of na gate 8. Pa bishita unit Economia y unit Salubridad & Servicio of pa informacion en general por parkeer dilanti Open Leercentrum (gate 6 y 7).

Poster voorlichtingsavond 2014