Colegio EPI

Pa forma profesionalismo y personalidad

Nieuws

Minister Michelle Hooyboer-Winklaar: Aplica pa un chens pa gana scholarship

by
webmaster

Minister di Enseñansa y Maneho di Famia, Michelle Hooyboer-Winklaar durante cu e tabata encarga cu maneho di e Ministerio di asuntonan social a tuma iniciativa pa ofrece un dia di reflexion y union pa hendenan muhe cu e Women’s Day Conference. Esaki a bira un exito rotundo for di su prome aña. Awo cu Minister Hooyboer-Winklaar tin enseñansa bao di su maneho y como un promotor di ‘Lifelong Learning’, e mandatario ta accentua esaki añadiendo un elemento nobo na e conferencia cu e entrega di un beurs (scholarship) di US$ 5,000 na dos hende muhe den nos comunidad.

Minister Michelle Hooyboer-Winklaar kier brinda un extra motivacion, inspiracion y sosten na tur hende muhe pa nan aplica nan conocemento y talento den nan enseñanza. Pa medio di cooperacion cu Aruba Scholarship Foundation, lo otorga e dos beursnan, cada uno di US$ 5,000, despues cu un seleccion entre tur aplicante tuma luga. Esaki e mandatario a anuncia dialuna durante un conferencia di prensa cu un yamada pa esunnan interesa pa manda nan aplicacion aden mas pronto posibel, pero sigur prome cu e deadline, cual ta dia 24 di februari, 2014.

Tin diferente criterio cu e aplicante mester cumpli cune. E aplicante mester scoge un estudio  den nos region of Merca, pues Hulanda ta exclui pasobra nan ya tin acceso na subsidio for di gobierno Hulandes cu no ta disponibel na studiantenan den nos region.

E studiante mester mantene un Cumulative Grade Point Average (GPA) di 3.0 of mas halto y mester ta registra como studiante di tempo completo (full time student), si ta scoge pa studia na Merca.

Tambe, e studiante – segun reglanan di Aruba Scholarship Foundation (ASF) – mester ta studiando of ta bay studia na un college of universidad acredita, e mester tin aprobacion medico y mester cera of tin un contract pa bolbe of keda y traha na Aruba pa e mesun cantidad di aña cu e ta studia afo cu asistencia financiero di ASF.

E universidad/facultad cu e studiante ta atendiendo mester ta aproba pa Aruba su Departamento di Enseñansa y en caso por ehempel e ta studiando medicina, e institucion mester ta aproba pa Departamento di Salubridad.

No tin restriccion pa cu cua ramo di estudio, pero loke si ta importante ta pa e studiante ta/a scoge un profesion cu por wordo eherce na Aruba, incluyendo arte y ciencia, entre otro baile (ballet). Tambe e pais di estudio no mester ta Merca, pero por ehempel studiantenan na universidadnan na Canada y Colombia, como tambe Universidad di Aruba por aplica.

E aplicante mester tin nacionalidad Hulandes y ta registra na Aruba. No ta necesario pa e studiante a nace na Aruba, pero si e ta cualifica pa un prestamo di gobierno di Aruba pa studia, e ta cualifica pa un beca.

E hende muhe cu aplica pa gana un di e dos beursnan durante Women’s Day Conference mester ta “needy and deserving”. “Needy” kiermen cu ora conta tur gasto hunto, incluyendo e prestamo cu e ta ricibi di Gobierno, e studiante no por logra cubri su gastonan anual pa estudio. “Deserving” kiermen cu e studiante ta merece e beca. E studiante aki tin bon punto na scol, pero tambe ta wordo evalua basa riba su esfuersonan den ramonan di liderazgo na scol y actividadnan civico y extra curicular, su motivacion pa sirbi e ser humano y su comunidad y pa ta exitoso.

Pa aplica pa un di e beursnan aki, e hende muhe mester manda un video of email pae.tromp@arubagovernment.aw prome cu dia 24 di februari 2014. Den e email of video e mester splica pakico su estudio ta importante p’e y con e lo cambia nos comunidad y haci un impacto riba otro hende muhe.

– Noticia cortesia di: www.24ora.com