Colegio EPI

Pa forma profesionalismo y personalidad

Nieuws

Anochi di informacion di tur opleiding na Colegio EPI diabierna 24 di mei

by
webmaster

Colegio EPI ta organisa un anochi di informacion pa tur studiante di scolnan secundario. E anochi aki lo tuma lugar diabierna awor dia 24 di mei, di 6:00 p.m. pa 9:00 p.m.

Meta principal di e anochi di informacion aki ta pa informa studiantenan di scolnan secundario EPB, MAVO y HAVO tocante e opleidingnan cu tin na Colegio EPI y kico ta e rekisitonan di admicion. Ta importante pa tene na cuenta cu pa wordo acepta pa un opleiding mester cumpli cu e profiel cu e opleiding ta exigi. Colegio EPI ta encurasha mayornan tambe pa bin cu nan yiunan pa asina duna guia y sosten den nan decision pa escoge un estudio.

Aparte di duna informacion di tur e opleidingnan, tambe lo tin oportunidad pa haya rondleiding na cada unit. Den e Open Leercentrum (OLC) lo tin oportunidad pa inscribi pa e aña escolar nobo y tambe lo tin informacion general di cada opleiding. Pa e studiante cu ainda no ta sigur den cua ramo e kier sigui studia den futuro, Colegio EPI ta encurashe pa bishita tur e unitnan pa asina e por ta sigur di tuma un bon decision pa su futuro.

Pa mas informacion di e anochi aki, un mapa di e campus y Colegio EPI en general por bishita e pagina aki.

Parkeerplaats y entrada di cada unit

Colegio EPI ta encurasha tur hende pa yega na ora pa asina por pasa bishita tur unit. Si bo persona sa specifico cua unit bo kier bishita, por favor tene cuenta cu lo siguiente. Pa bishita unit Ciencia & Tecnologia por parkeer dilanti gate 2, e entrada tambe lo ta na gate 2. Pa bishita unit Economia y unit Salubridad & Servicio por parkeer dilanti Open Leercentrum (gate 6 y 7), entrada lo ta na e Open Leercentrum. Pa bishita Hospitality & Tourism por parkeer na gate 8 y e entrada tambe lo ta na gate 8.