Bishita di BPV team na Corsou
Recientemente e team di docente cu ta encarga cu stage na Colegio EPI a haci un bishita di trabou na Corsou. E team dinamico aki cu ta wordo yama stagebureau of BPV-bureau (Beroepspraktijkvorming) ta traha pa mehora y centralisa tur aspecto cu tin di haber cu stage di e studiante. E stagebureau lo ta un punto central di stagiaires, stageplaatsen, stakeholders y otro organisacionan cu ta traha cu EPI.
E team ta consisti di Carlos Martinus (Opleidingsmanager y Voortrekker di e grupo), Eddelyn Figaroa-Dijkhoff (Stage Coördinator Colegio EPI), Anthony Figaroa (Stage Coördinator Ciencia & Tecnologia), Mena Curiel (Stage Coördinator Salubridad & Servicio), Vanessa Loefstop (Stage Coördinator Hospitalidad & Turismo) y Natalie Carlo (Stage Coördinator Economia).
Meta principal di e bishita aki tabata pa cera conoci cu instancianan encarga cu stage di studiantenan di MBO na Corsou y siña di best practices con pa eleva calidad di enseñanza y stage. E ideanan adkeri por trece bek na Colegio EPI y caminda necesario adaptanan y incorporanan den e organisacion.
E miembronan di e stagebureau a haci bishita na KBB, cu ta e Kenniscentrum Beroepsonderwijs en Bedrijfsleven. Tambe a haci bishita na Rooms Katholieke Middelbare Technische School y Klinika Capriles.
E team di stagebureau a keda masha impresiona cu e nivel halto di profesionalismo di e isla ruman y a haya e bishita uno sumamente informativo cu lo yuda fortifica y structura e departamento mas eficientemente.
