Colegio EPI

Pa forma profesionalismo y personalidad

Nieuws

Open Avond na Colegio EPI diabierna 23 di maart

by
webmaster

Colegio EPI ta orguyoso di organisa pa di 2 aña consecutivo un Open Avond caminda lo duna informacion necesario na tur studiante di scolnan secundario. E anochi di informacion aki lo tuma lugar diabierna awor 23 di maart, di 6:00 p.m. pa 9:00 p.m.

Meta principal di e Open Avond ta pa informa studiantenan di scolnan secundario EPB, MAVO y HAVO tocante e opleidingnan cu tin na Colegio EPI y kico ta e rekisitonan di admicion. Ta importante pa tene na cuenta cu pa wordo acepta pa un opleiding mester cumpli cu e profiel cu e opleiding ta exigi. Colegio EPI ta encurasha mayornan tambe pa bin cu nan yiunan pa asina duna guia y sosten den nan decision pa escoge un estudio.

Aparte di duna informacion di tur e opleidingnan, tambe lo tin oportunidad pa haya rondleiding di e campus caminda cu por cera conoci cu tur e facilidadnan di Colegio EPI manera e Auditorium, Foodcourt, Collegezaal y e Open Leercentrum (OLC). Den e OLC lo tin e oportunidad pa inscribi online pa e aña escolar nobo. Esaki lo ta e prome aña cu Colegio EPI lo facilita esaki na e futuro studiantenan.

Ora un studiante caba Colegio EPI e ta un profesional riba nivel intermedio (MBO). Hopi studiante ta dicidi cu nan kier sigui studia riba nivel HBO. Na e Open Avond bo por haya tur informacion necesario unda bo por sigui studia ora bo termina bo estudio na Colegio EPI sea aki na Aruba mes of internacional.

Poster Open Avond 2012

Como entretenimento durante e anochi aki lo tin shows di studiantenan, un Dino Jump pa e bishitantenan chikito y e Foodcourt lo ta habri pa cumpra algo di bebe of come.

E aña aki lo habri portanan di entrada di tur unit riba e campus pa asina tur persona por yega mas liher na e unit di nan interes. Pa esnan di San Nicolas lo tin dos bus ta sali 5.30 pm for di YMCA y lo regresa for di Colegio EPI pa 9.15 pm rumbo back pa San Nicolas.

Un biaha mas Colegio EPI ta invita tur studiante di EPB, Mavo y Colegio Arubano, muy en especial esnan den 3e jaars MAVO cu tin cu escohe nan profiel, pa bishita e Open Avond. Pa e studiante cu ainda no ta sigur den cua ramo e kier sigui studia den futuro, Colegio EPI ta encurashe pa bishita tur e unitnan pa asina bo por ta sigur cu bo a tuma un bon decision pa bo futuro.

Pa mas informacion di e Open Avond, un mapa di e campus y Colegio EPI en general por bishita e pagina aki.