Colegio EPI

Pa forma profesionalismo y personalidad

Nieuws

Exitoso Open Avond di Colegio EPI

by
webmaster

Diabierna ultimo a tuma lugar e prome Open Avond organisa pa Colegio EPI. E anochi aki tabata uno sumamente exitoso caminda cu hopi studiante y nan mayornan a bin wak kiko Colegio EPI ta ofrece.

Colegio EPI ta consisti di 4 unit, esta unit Ciencia & Tecnologia, unit Economia, unit Hospitalidad & Turismo y unit Salubridad & Servicio. E 4 unitnan aki ta ofrece un total di 12 opleiding riba nivel MBO 3 y 4.

Meta principal di e Open Avond tabata pa informa studiantenan di scolnan secundario tocante e opleidingnan cu tin na Colegio EPI y kiko ta e rekisitonan pa admicion (toelatingseisen) na e diferente estudionan. Hopi biaha studiantenan ta escohe un profiel sin prome ta na altura di kiko precies nan por hasi cu e escogencia di materia aki den futuro cual sigur ta di importancia pa nan futuro carera profesional.

Durante e anochi bishitantenan por a pasa na tur e unitnan di Colegio EPI pa asina haya un bista directo di tur e opleidingnan. Di e forma aki Colegio EPI kier a duna oportunidad na por ehempel tur esnan cu tin cu escoge nan ‘profiel’ pa haya tur informacion necesario prome cu hasi escogencia final.  Studiantenan y docentenan a duna informacion di opleidingnan y tambe tabata tin rondleiding di e campus caminda cu por a sera conoci cu e Foodcourt, e Open Leercentrum y e Collegezaal.

E anochi di informacion a sera cu un tremendo show di studiantenan di Colegio EPI. Studiantenan di cada unit a hasi diferente presentacion di baile y tambe tabata tin presentacion di un grupo musical cu naturalmente integrantenan di Colegio EPI mes. Tambe tabata tin un simulacion di Rode Kruis Aruba y studiantenan di Unit Salubridad & Servicio cu a laga tur hende presente den suspenso.

Colegio EPI ta hopi contento cu e acogida di e Open Avond y ta spera di mira hopi studiantenan nobo entusiasma cu nan escogencia di bin sigui studia na un di e opleidingnan cu Colegio EPI tin di ofrece.

Tags: , , , ,