Colegio EPI

Pa forma profesionalismo y personalidad

Nieuws

Open Avond na Colegio EPI dia 8 di april

by
webmaster

Lo habri scol pa publico di 5.00 pm – 9.00 pm

Colegio EPI ta consisti di 4 unit, esta unit Ciencia & Tecnologia, unit Economia, unit Hospitalidad & Turismo y unit Salubridad & Servicio. E 4 unitnan aki ta ofrece un total di 12 opleiding riba nivel MBO 3 y 4.

Meta principal di e Open Avond ta pa informa studiantenan di scolnan secundario tocante e opleidingnan cu tin na Colegio EPI y kiko ta e rekisitonan pa admicion (toelatingseisen) na e diferente estudionan. Ta invita muy en especial esnan den 3e jaars MAVO y tambe esnan di EPB cu tin cu bay escohe nan profiel pronto pa atende e Open Avond pa asina haya tur informacion necesario prome cu tuma un desicion.

Den pasado cada unit tabata organisa un tipo di ‘Open Dag’ riba nan mes pa duna informacion na studiantenan di nan opleiding. Tambe e dekano di unit tabata bishita e scolnan secundario pa duna informacion. Pero e aña aki a dicidi di habri porta di ful e scol pa asina duna oportunidad na tur studiante di EPB, Mavo y Colegio Arubano pa bin wak kiko tur Colegio EPI tin pa ofrece. Aparte di duna informacion di opleidingnan, tambe lo tin rondleiding door di e campus caminda cu por sera conoci cu e Foodcourt, e Open Leercentrum y e Collegezaal.

Durante e Open Avond bishitantenan lo por pasa na nan unit di escogencia y haya informacion di e opleidingnan cu ta wordo ofreci. Cada unit lo tin representantenan cla pa duna rondleiding y informacion specifico di cada profesion. Tambe lo haya splicacion amplio di e rekisitonan pa admicion. Por ehempel, no ta tur nivel di EPB por sigui un estudio na Colegio EPI y muchanan di Mavo of Havo mester tin un profiel cu ta cuadra cu e estudio cu nan kier bay hasi.

Ta hopi importante pa sa tambe ta ki estudionan riba nivel HBO por sigui cune ora un studiante termina su estudio na Colegio EPI.

Colegio EPI ta encurasha mayornan tambe pa bin cu nan yiunan pa asina duna guia y sosten den nan decision pa escoge un estudio. Un invitacion ta bay tambe na comunidad en general pa bin tira un bista na Colegio EPI y mira na unda nos profesionalnan di mañan ta cuminsa cu nan estudio.

 

Aparte di informacion di opleiding tambe lo tin optredens/shows di studiantenan y Foodcourt lo ta habri pa cumpra algo di bebe of come. Tambe lo hasi rondleiding di e campus caminda cu e Open Leercentrum lo fungi como punto central di informacion.

Un biaha mas Colegio EPI ta invita tur studiante di EPB, Mavo y Colegio Arubano, cu ta interesa pa sigui cu un estudio riba nivel profesional pa bishita e Open Avond. Specialmente esnan cu tin cu ainda hasi un escogencia di profiel, bishita e Open Avond prome pa asina bo ta sigur cu bo ta tuma un bon decision pa bo futuro. Tambe Colegio EPI kier a encurasha e mayornan pa compaña nan yiu na e Open Avond pa asina yudanan den e decision importante aki pa nan futuro.

E studentenraad ta bay hunga un rol grandi den e organisacion di e anochi aki. E mensahe di e studentenraad ta tambe manera e slogan di e poster ta bisa: ‘My future, my choice’. Asina ta bin bishita e Open Avond pa asina Bo Choice bira Bo Future!

Tags: , , , ,