Colegio EPI

Pa forma profesionalismo y personalidad

Nieuws

Manifiesto contra violencia

by
webmaster

Personal y studiantenan di Colegio E.P.I. unidad Salubridad & Servicio ta manifesta nos disgusto y repudio pa e situacion hopi serio di violencia cu ta tumando lugar den nos comunidad.

IMG_2494 (Large)

Diabierna 21 di januari ultimo un colega di nos a wordo asalta, agredi  y maltrata severamente. Consequencia ta perdida di un wowo. Esaki ta e parti fisico pa no papia mes di e impacto emocial riba su persona y tur esnan cu ta rondone. Nos ta menciona tambe caso di violencia di un mayor di un studiante cu a wordo asesina y hopi otro casonan di violencia cu nos ta wordo confronta cune, casi diariamente, den nos trabao. Tur hende sa di casonan unda cu esnan cu a causa esakinan ta cana rond y no a wordo poni responsabel pa nan actonan violento.

Nos kier expresa nos desapunto grandi pa cu e decadencia di norma y balornan den nos comunidad. Norma y balornan su fundeshi ta wordo forma den nos hogarnan. Nan mester ta refleha serca mayornan, entre parehanan, den famia, den bisindario y comunidad. Tambe den enseñansa, durante evenementonan manera nos carnaval . Muestra di norma y balornan tin cu ta presente tambe durante e bida nocturno of riba caya.

Nos kier haci un apelacion fuerte riba agrupacionnan den nos comunidad pa duna un man pa combati violencia na Aruba. Ta di aplaudi si bin cooperacion entre instancianan y organisacionnan pa sera cabes y uni forsa preveni y combati violencia.

Nos ta pensa concreto riba e siguiente entidadnan na Aruba:

–         Mayornan y educadornan,

–         Nos parlamento,

–         Nos medionan di comunicacion,

–         Nos serviceclubnan,

–         Instancianan, fundacionnan, comicionnan trahando cu nos muchanan, hobennan, adultonan y otro gruponan special y/of specifico.

–         Tur esnan involvi den enseñansa,

–         Sindicatonan,

–         Polis,

–         Doñonan di trabao y tur agrupacionnan y organisacionnan cu por tuma e fenomeno di violencia den comunidad na serio y actua contra esaki.

–         Gobierno di nos pais

Ta responsabilidad di henter Aruba pa crea un comunidad na unda ta reina respet, harmonia y paz. Nos di Colegio E.P.I. unidad Salubridad & Servicio ta cuminsa cu asumi nos responsabilidad dor di integra e competencia di bon cuidadano den nos enseñansa.

Nos kier a contribui cu algun sugerencianan/accionnan concreto cu por yuda enfrenta y evita violencia den nos comunidad.

–         Cursonan continuo cu hermentnan pa sostene mayornan/educadornan den educacion di yuinan/sernan keri.

–         Serie di programanan di consientisacion riba importancia di norma y balornan. Aki ta pensa riba mensahenan positivo y concreto haciendo uso di medionan di comunicacion (corantnan, television, radio, billboards y posibilidadnan electronico manera facebook, twitter etc.) E spot cu tin actual tocante pasenshi na television por sirbi como ehempel.

–         Programanan pa hobennan mas grandi (te 18 aña sigur) den centronan di trai merdia y otro centronan comunitario.

–         Ampliacion di servicio di polisnan den bario cu servicionan di trahado social, profesional pa guia actividadnan y fasilidadnan deportivo. Esaki sigur durante oranan di atardi ,anochi, fin di siman y periodonan liber di scol.

–         Na e representantenan di e Dialogo Social cu lo sigui  dentro di poco nos ta urgi pa den cuadro di e punto di seguridad cu ta riba agenda trata violencia cu diligencia y cu prioridad. Tratamento di e punto aki mester resulta den acionnan concreto y efectivo.

–         Haci uso di bon experiencianan di diferente programanan di consientisacion cu a wordo implementa na paisnan (alrededor di nos) cu tambe ta wordo confronta cu e problematica di violencia.

–         Duna e agresor/abusador e oportunidad pa terapia, curso y sosten pa asina sana su mes y scohe pa un comportacion sano.

Nos tur mester tin e curashi pa tuma un posicion firme contra violencia den nos comunidad. Esaki pa nos mes y pa e imagen cu nos ta crea como un isla turistico. Nos tin un responsabilidad pa nos mes y pa nos prohimo. Si nos no trece cambio den locual nos ta haciendo actualmente pa cu violencia nos lo keda haya (mas) casonan di violencia. Cada paso chikito pero concreto lo yuda. Nos ta cuminsa awor.

LAGA NOS BALORA BIDA, RESPETA Y APRECIA HENDE.

Tags: ,